Zameen o Zamaañ Tumhaare Liye, Makeen o Makaañ Tumhaare Liye
Chuneen o Chunaañ Tumhaare Liye, Bane Do Jahaañ Tumhaare Liye
Dahan Me Zabaañ Tumhaare Liye, Badan Me Hai Jaañ Tumhaare Liye
Ham Aaye Yahaañ Tumhaare Liye, Ut’theñ Bhi Wahaañ Tumhaare Liye
Farishte Khadam Rasool Hasham Tamaam e Umam Ghulaam e Karam
Wujood o ’Adam Hudoos o Qidam Jahaañ Me ‘Ayaan Tumhaare Liye
Kaleem o Najeeh, Maseeh o Safi, Khaleel o Razi, Rasool o Nabi
Ateeq o Wasi Ghani o Ali Sana Ki Zabaañ Tumhaare Liye
Asaalat e Kul Imaamat e Kul Siyaadat e Kul Imaarat e Kul
Hukoomat e Kul Wilaayat e Kul Khuda Ke Yahaañ Tumhaare Liye
Tumhaari Chamak Tumhaari Dhamak Tumhari Jhalak Tumhaari Mahak
Zameen o Falak Simaak o Samak Me Sik’kah Nishaañ Tumhaare Liye
Ye Shams o Qamar Ye Shaam o Sahar Ye Barg o Shajar Ye Baagh o Samar
Ye Taigh o Sipar Ye Taaj o Kamar Ye Hukm e Rawaañ Tumhaare Liye
Ye Faiz Diye Wo Jood Kiye Ke Naam Liye Zamaana Jiye
Jahaañ Ne Liye Tumhaare Diye Ye Ikramiyaañ Tumhaare Liye
Sahaab e Karam Rawaana Kiye Ke Aab e Ni’am Zamaana Piye
Jo Rakhte Thay Ham Wo Chaak Siye Ye Satr e Badaañ Tumhaare Liye
Sana Ka Nishaañ Wo Noor Fishaañ Ke Mehr Washaañ Ba Aañ-Hamah Shaañ
Ba-Saaya Kashaañ Mawaakib Shaañ Ye Naam o Nishaañ Tumhaare Liye
‘Ataa e Arab Jala e Karab Fuyooz e ’Ajab Baghair e Talab
Ye Rahmat e Rab’b Hai Kis Ke Sabab Ba-Rab’b e Jahaañ Tumhaare Liye
Zunoob e Fanaa ‘Uyoob e Haba Quloob e Safa Khutoob e Rawa
Ye Khoob e ’Ata Kuroob e Zuda Pa-e Dil o Jaañ Tumhaare Liye
Na Jinn o Bashar Ke Aathoñ Pahar Mala’ika Dar Pe Basta Kamar
Na Jabha o Sar Ke Qalb o Jigar Haiñ Sajda Kunaañ Tumhaare Liye
Na Rooh e Ameeñ Na ‘Arsh e Bareeñ Na Lauh e Mubeeñ Ko-ee Bhi Kaheeñ
Khabar Hee Nahiñ Jo Ramzeñ Khuleeñ Azal Ki Nihaañ Tumhaare Liye
Jinaañ Me Chaman, Chaman Me Saman, Saman Me Phaban, Phaban Me Dulhan
Saza e Mihan Pe Aise Minan Ye Amn o Amaañ Tumhaare Liye
Kamaal e Mihaañ Jalaal e Shahaañ Jamaal e Hisaañ Me Tum Ho ‘Iyaañ
Ke Saare Jahaañ Me Roz e Fakaañ Zil’l e Aa-ina Saañ Tumhaare Liye
Ye Toor Kuja Siphar To Kya Ke ‘Arsh e Ulaa Bhi Door Raha
Jihat Se Wara Wisaal Mila Ye Rif’at e Shaañ Tumhaare Liye
Khaleel o Naji, Maseeh o Safi, Sabhi Se Kahi, Kaheeñ Bhi Bani
Ye Be-Khabari Ke Khalq Phiri Kahaañ Se Kahaañ Tumhaare Liye
Ba-Fawr e Sada Samaañ Ye Bandha Ye Sidra Ut’tha Wo ‘Arsh Jhuka
Sufoof e Sama Ne Sajda Kiya Huwi Jo Azaañ Tumhaare Liye
Ye Marhamateñ Ke Kach’chi Mateñ Na Ch’horeñ Lateñ Na Apni Gateñ
Qusoor Kareñ Awr Un Se Bhareñ Qusoor e Jinaañ Tumhaare Liye
Fanaa Ba-Darat Baqa Ba-Barat Ze Har Do Jihat Ba-Gird e Sarat
Hai Markaziy’yat Tumhaari Sifat Ke Donoñ Kamaañ Tumhaare Liye
Ishaare Se Chaand Cheer Diya Ch’hupe Huwe Khur Ko Pheyr Liya
Gaye Huwe Din Ko ‘Asr Kiya Ye Taab o Tawaañ Tumhaare Liye
Saba Wo Chale Ke Baagh Phale Wo Phool Khile Ke Din Hoñ Bhale
Liwa Ke Talay Sana Me Khule RAZA Ki Zabaañ Tumhaare Liye