Mustafa Khayr ul Wara Ho
Sarwar e Har Do Sara Ho
Apne Ach’choñ Ka Tasad’duq
Hum Badoñ Ko Bhi Nibaaho
Kis Ke Phir Ho Kar Raheñ Ham
Gar Tumheeñ Ham Ko Na Chaaho
Bad Hanseñ Tum Un Ki Khaatir
Raat Bhar Ro’wo Karaa-ho
Bad Kareñ Har Dam Bura-ee
Tum Kaho Un Ka Bhala Ho
Ham Wohi Naashusta Roo Haiñ
Tum Wohi Behr e ’Ataa Ho
Ham Wohi Shaayaan e Rad Haiñ
Tum Wohi Shaan e Sakha Ho
Ham Wohi Be Sharm o Bad Haiñ
Tum Wohi Kaan e Haya Ho
Ham Wohi Nang e Jafa Haiñ
Tum Wohi Jaan e Wafa Ho
Ham Wohi Qaabil Saza Ke
Tum Wohi Rahm e Khuda Ho
Charkh Badle Dahr Badle
Tum Badalne Se Waraa Ho
Ab Humeñ Hoñ Sahw Haasha
Aisi Bhooloñ Se Juda Ho
Umr Bhar To Yaad Rakha
Waqt Par Kya Bhoolna Ho
Waqt e Paidaaish Na Bhoole
‘Kaifa Yansaa’ Kyuñ Qaza Ho
Ye Bhi Maula ‘Arz Karduñ
Bhool Agar Jaawo To Kya Ho
Wo Ho Jo Tum Par Giraañ Hai
Wo Ho Jo Hargiz Na Chaaho
Wo Ho Jis Ka Naam Lete
Dushmanoñ Ka Dil Bura Ho
Wo Ho Jis Ke Rad’d Ki Khaatir
Raat Din Waqf e Du’a Ho
Mar Mit’eñ Barbaad Bande
Khaana Aabaad Aag Ka Ho
Shaad Ho Iblees Mal’ooñ
Gham Kise Is Qahr Ka Ho
Tum Ko Ho Wallah Tum Ko
Jaan o Dil Tum Par Fida Ho
Tum Ko Gham Se Haq Bachaaye
Gham ‘Adu Ko Jaañ Gaza Ho
Tum Se Gham Ko Kya Ta’aluq
Be-Kasoñ Ke Gham-Zudah Ho
Haq Duroodeñ Tum Pe Bheje
Tum Mudaam Us Ko Sara Ho
Wo ‘Ataa De Tum ‘Ataa Lo
Wo Wohi Chaahe Jo Chaaho
Bar To Aw Paashad To Bar Maa
Taa Abad Ye Silsilah Ho
Kyuñ RAZA Mushkil Se Dariye
Jab Nabi Mushkil Kusha Ho