Zar’re Jhar Kar Teri Pezaaron Ke
Taaj e Sar Bante Haiñ Sayyaron Ke
Hum Se Choroñ Pe Jo Farma-eñ Karam
Khil’at e Zar Baneñ Pushtaaroñ Ke
Mere Aaqa Ka Wo Dar Hai Jis Par
Maathe Ghis Jaate Haiñ Sardaaroñ Ke
Mere Esa Tere Sadqe Jaawuñ
Taur Be-Taur Haiñ Bimaaroñ Ke
Mujrimo! Chashm e Tabas’sum Rakho
Phool Ban Jaate Haiñ Angaaroñ Ke
Tere Abru Ke Tasad’duq Pyaare
Band Kar’re Haiñ Giriftaaroñ Ke
Jaan o Dil Tere Qadam Par Waare
Kya Naseebe Haiñ Tere Yaaroñ Ke
Sidq o Adl o Karam o Himmat Me
Chaar Soo Shohre Haiñ In Chaaroñ Ke
Behr e Tasleem e Ali Maidaañ Me
Sar Jhuke Rehte Haiñ Talwaaroñ Ke
Kaise Aaqa-oñ Ka Banda Huñ RAZA
Bol Baale Meri Sarkaaroñ Ke