Lahad Me Ishq e Rukh e Shah Ka Daagh Le Ke Chale
Andheri Raat Suni Thee Charaagh Le Ke Chale
Tere Ghulaamoñ Ka Naqsh e Qadam Hai Raah e Khuda
Wo Kya Bahak Sakay Jo Ye Suraagh Le Ke Chale
Jinaañ Banegi Muhib’baan e Chaar Yaar Ki Qabr
Jo Apne Seene Me Ye Chaar Baagh Le Ke Chale
Gaye, Ziyaarat e Dar Ki, Sad Aah Waapas Aaye
Nazar Ke Ashk Pich’che Dil Ka Daagh Le Ke Chale
Madina Jaan e Jinaan o Jahaañ Hai Wo Sun Leñ
Jinheñ Junoon e Jinaañ Soo e Zaagh Le Ke Chale
Tere Sahaab e Sukhan Se Na Nam Ke Nam Se Bhi Kam
Baleegh Bahr e Balaaghat Balaagh Le Ke Chale
Huzoor e Taiba Se Bhi Ko-ee Kaam Bar’h Kar Hai
Ke Jhoote Heele Makr o Faraagh Le Ke Chale
Tumhaare Wasf e Jamaal o Kamaal Me Jibreel
Muhaal Hai Ke Majaal o Masaagh Le Ke Chale
Gilaah Nahiñ Hai Mureed Rasheed e Shaitaañ Se
Ke Us Ke Wus’at e Ilmi Ka Laagh Le Ke Chale
Har Aik Apne Baray Ki Bara-ee Karta Hai
Har Aik Mugbachah Mugh Ka Ayaagh Le Ke Chale
Magar Khuda Pe Jo Dhab’ba Darogh Ka Thopa
Ye Kis La’eeñ Ki Ghulaami Ka Daagh Le Ke Chale
Wuqu’ e Kizb Ke Ma’ni Durust Awr Qud’doos
Hiye Ki Phoote ‘Ajab Sabz Baagh Le Ke Chale
Jahaañ Me Ko-ee Bhi Kaafir Sa Kaafir Aisa Hai
Ke Apne Rab’b Pe Safaahat Ka Daagh Le Ke Chale
Pari Hai Andhe Ko ‘Aadat Ke Shorbe Hee Se Khaaye
Bat’eyr Haath Na Aayi To Zaagh Le Ke Chale
Khabees Behr e Khabeesa, Khabeesa Behr e Khabees
Ke Saath Jins Ko Baaz o Kulaagh Le Ke Chale
Jo Deen Kaw’woñ Ko De Baithe Unko Yaksaañ Hai
Kulaagh Le Ke Chale Ya Ulaagh Le Ke Chale
RAZA Kisi Sag e Taiba Ke Paa-oñ Bhi Choome
Tum Awr, Aah! Ke Itna Dimaagh Le Ke Chale